Болат Өтемұратов Қоры Арал өңірінің 40 отбасыларына үй сыйлады
Қызылорда облысы Арал қаласының 40 отбасы Болат Өтемұратов Қорының «Баламекен» жобасы шеңберінде жаңа баспанаға ие болды. Жаңа пәтерлерді иеленген отбасылардың қатарына көп балалы отбасылар, жетім балалар, мүгедектер мен апатты үйлерде тұратын отбасылар кірді. Бүгін Қызылорда облысының әкімі Гүлшара Әбдіқалықованың қатысуымен пәтер кілттері болашақ тұрғындарына тыбас етілді.
64 ш.м. құрайтын үш бөлмелі пәтер және 47 ш.м. болатын екі бөлмелі пәтер бір қабатты 4 пәтер иесіне арналған үйлерде орналасқан. Үйлер электр, газ және ауыз су жүйелерімен жабдықталып, ішінде сантехника, газ плитасы мен су жылытқышы орнатылған. Әр пәтер иесіне 6 сотық жер учаскесі бөлінген.
Қызылорда облысының әкімі Гүлшара Әбдіқалықова пәтерлердің тұрғын үй кезегінде тұрған мұқтаж азаматтарға тегін берілетінін атап өтті. «Қазіргі таңда ауданда 1112 адам тұрғын үй кезегінде тұр, осы тізімдегі 14 отбасы апатты жағдайдағы ғимаратта тұрып келген. Бұл отбасылар жаңа пәтерлерге бірінші кезекте көшірілді. Сонымен қатар, қалған пәтерлер көп балалы отбасылар, жетім және ата-анасының қамқорлығынсыз қалған балалар, мүгедектер мен мүгедек балаларды тәрбиелеп отырған отбасыларға табысталады. Бұл жобаға қолдау көрсеткен және көптеген отбасыға қуаныш сыйлаған Болат Өтемұратов Қорына алғысымды білдіремін», — деді аймақ басшысы.
Арал тұрғыны, сегіз баланың анасы Гүлдария Мижанова өз сезімін жасырмайды: «Бүгін біз үшін қуанышты күн — біз жаңа үйіміздің кілтін алдық! Пәтер жарық, таза және жайлы, бізге өте ұнайды. Біз Болат Өтемұратов Қорына және Қызылорда облысы мен Арал ауданының әкімдіктеріне шын жүректен алғыс айтамыз. Рахмет!»
«Қор 300 миллион теңге мөлшерінде Арал қаласының отбасыларына «Баламекен» жобасы бойынша жаңа пәтерлер сатып алуды қаржыландырды. Жоба 2019 жылдан бастап жүзеге асырылып, 4,1 миллиард теңге сомасына Қызылорда, Арыс Мырзакент және Арал қалаларында 390 отбасын жаңа баспанамен қамтамасыз етті», — деп атап өтті Болат Өтемұратов Қорының директоры Марат Айтмағамбетов.
Осы жылдың шілде айында Болат Өтемұратов Қоры Арал ауданында орын алған қуаңшылыққа байланысты 263 миллион теңге мөлшерінде көмек көрсетті. Бөлінген қаражат малға арналған жемшөп, мал азығын дайындауға арналған ауыл шаруашылық техникасын сатып алуға жұмсалды. Сонымен қатар, бөлінген қаражатқа Аспай су ағытқысы іске қосылып, Кіші Арал теңізіне су ағыла бастады.