Ермек Көшербаев Астанадағы «Асыл мирас» аутизм орталығына барды
Іс-шараға сондай-ақ Астана қаласының әкімі Жеңіс Қасымбек те қатысты.
Қазақстан Премьер-Министрінің орынбасары Ермек Көшербаев Астанадағы «Асыл мирас» аутизм орталығына барды. Іс-шараға сондай-ақ Астана қаласының әкімі Жеңіс Қасымбек те қатысты.
Сапар мақсаты – 2015 жылдан бастап Болат Өтемұратов қоры жүзеге асырып келе жатқан «Аутизм. Баршамызға бір әлем» бағдарламасы аясында ашылған 13 орталықтың бірінің жұмысымен танысу болды.
«Асыл мирас» орталығында Ермек Көшербаев оқу бөлмелерін қарап, қолданбалы мінез-құлық талдауы (ABA) әдістемесімен танысып, педагогтермен, ата-аналармен және орталықта білім алып жатқан балалармен әңгімелесті.
Аутизм орталығында балалармен жұмыс жасаудың мынадай негізгі бағыттары ұсынылған: әлеуметтік, оқу және өмірлік дағдыларды дамыту, ерте қолдау бағдарламалары, сондай-ақ JASPER әдістемесі.
Болат Өтемұратов қорының директоры Айнұр Кәрібозова әр бағдарламаның мақсаттары мен тәсілдері туралы толық айтып, әр балаға жеке көзқарастың маңыздылығын атап өтті. Ол, әсіресе, отбасыларды қолдауға ерекше мән берілетінін айтты, бұл кешенді көмек көрсетуді қамтамасыз етеді, бейімделуге және баланың дамуына ата-аналардың белсенді қатысуына ықпал етеді.
«Асыл мирас» орталығы 10 жылдан бері аутизм спектрінің бұзылыстары бар балаларға тегін қызмет көрсетіп келеді, үздік халықаралық тәжірибені енгізіп, жоғары сапалы көмек көрсетеді», – деп атап өтті.
Ермек Көшербаев ерекше білім беру қажеттіліктері бар балаларды қолдау – мемлекет, мамандар және қоғам тарапынан күш-жігерді үйлестіруді қажет ететін маңызды міндет екенін атап өтті.
«Ерекше білім беру қажеттіліктері бар балаларды қолдау – бұл мемлекет, мамандар және қоғамның күшін біріктіруді қажет ететін маңызды міндет. «Асыл мирас» сияқты орталықтар осы міндетті шешуге зор үлес қосуда. Мұнда әр балаға халықаралық әдістемелерге негізделген білікті көмек көрсетілетін жағдайлар жасалған», – деді ол.
Болат Өтемұратов қоры «Аутизм. Баршамызға бір әлем» бағдарламасын 10 жылдан бері жүзеге асырып келеді. Бүгінде Қазақстан бойынша 13 тегін «Асыл мирас» орталығы жұмыс істейді. Бұл орталықтарда балаларға білікті көмек көрсетіліп, ата-аналармен де жұмыс жүргізіледі. Бағдарлама жүзеге асырылған жылдар ішінде 16 мыңнан астам бала мен олардың отбасылары қолдау алды.
